Peter Deane hannaði fluguna Black Eyed Prawn á sjöunda áratug síðustu aldar.  Flugan þróaðist með árunum í þá flugu sem við þekkjum, Frances. Flugan var afar umdeild og er jafnvel enn.  Enn eru til veiðimenn sem setja Frances aldrei undir þar sem þeir telja „Frances ekki vera flugu“. Hvað sem öllum fordómum líður þá er Frances einhver gjöfulasta laxafluga landsins.  Annars vegar er flugan afar gjöful og hins vegar er hún mikið notuð, sem skýrir kannski hversu margir fiskar eru skráðir á hana. Frances er hnýtt í mörgum stærðum, útfærslum og litum.  Rauð Frances er að öllu jöfnu talin sú besta. Frances með kúlu kom fyrst fram á sjónarsviðið fyrir nokkrum árum, sló strax í gegn og er orðin ein af vinsælustu veiðiflugum landsins. Málverk mitt sem er 90x90cm er af rauðum Frances, Micro Tungsten Gold keiluhaus.